5+1 🖐🏿☝🏿 不單止係 五大訴求，缺...

5+1 🖐🏿☝🏿
不單止係 五大訴求，缺一不可；
而家仲係 五年居英，一年入籍。
消息一出，阿媽即刻叫我移民英國🇬🇧。

從前都有移民嘅諗法，不過只係得個諗。
呢一刻好似來得太快，真係要好認真去思量，
放棄喺香港擁有嘅一切去開展第二人生？
去一個陌生地方，是好是壞？太多未知之數。

另一方面，
好多人會覺得香港係自己屋企點解要走？
以前我都會咁諗，但國安法之後，
我睇咗幾位經濟學者嘅分析，
香港短期內都仲係馬照跑、舞照跳，
但長遠而言種下失去自由嘅陰霾，
代價可能就係金融中心嘅地位被削弱。

當你睇到北京嘅施壓，
大概都會估到你所追求嘅民主同自由，
將會係一件虛幻嘅事情。
當未來不再係你想像嘅未來，
東方之珠粒珠唔再發亮，
你還會留下嗎？

昔日嘅中環人主要講英文同廣東話，
你眼見而家已經好多人講普通話；
昔日上市公司多數係英資同華資，
你眼見而家已經最少有七成係中資。
你好清楚知道香港走在時代巨輪上，
中國化係無可避免嘅必然事實。
咁你覺得仲有啲乜嘢值得留戀嘅地方？

我冇辦法判斷去英國係咪一個正確嘅抉擇，
但的而且確今次BNO平權係千載難逢，
而且要去就越早越好，
因為中英嘅關係同英國人民嘅取態都係可變因子。

我打個比喻，
好耐之前買咗個位置靚仲背山面海嘅單位，
你好鐘意呢個家仲將佢佈置得美輪美奐。
點不知有日前面話要起樓，
你好清楚前面嘅海景將要消失，
你好清楚你單位會大幅貶值。
咁啱第二個地區有個都係望海嘅單位大劈價，
你會留喺你好愛惜又熟悉嘅原地？
還是換樓去繼續可以望到海嘅折扣單位？
不過在理性與感性之間，人往往總難跳出舒適圈。
攝於tower bridge🏰，背著the shard🔺，望天打掛😂。